لصحة شعرك

مساء الخير عليكوا جميعا وحشتونى جدا جدا غبت شوية عليكوا بس راجعلكم بموضوع مهم جدا لكل ست ولكل بنت ومعظمنا بيعانى منه وهنتكلم فيه إنهاردة بناء على طلباتكم .موضوعنا إنهاردة عن مشاكل الشعر من تلف وتقصف وتساقط وهيشان وجفاف وخلافة وزى ما عودتكم لازم قبل ما نعرف إيه العلاج نتكلم مبدئيا عن الأسباب المؤدية لكل المشاكل دي لأن زي ما إتفقنا إن الوقاية ديما خير من العلاج علشان كدة خلينا نستعرض الأسباب أولا وبعدين هنزلكم وصفات لكل مشكله على حدى وأنا واثقة إن شاء الله هتنول رضاكم وهتعجبكم .مبدأيا – كدا كتير مننا أو معظمنا بيستخدموا مستحضرات  للشعر من صبغات  ومواد لتفتيح لونه ومواد لتنعيمه وتمليسه والمشكلة الأكبر في المستحضرات الخاصة للتخلص من التجعيد أو مستحضرات فرد وتنعيم الشعر وإستخدام المستحضرات دى بشكل مستمر ومتواصل بيضعف الشعر ويفقدة طبيعتة وطبعا بيقفصفة وبيكون سبب فى تساقطة .الحاجة التانية – هي تعرض الشعر لآشعة الشمس المضرة فترة طويلة وكمان تعرض الشعر  لدرجات الحرارة العالية جدا زي السيشوار والبيبي ليس وخلافة من أدوات تصفيف الشعر أو درجات الحرارة المنخفضة جدا زي البرد الشديد إلى بنتعرضلة فى الشتاء وإلى بيفقد الشعر رطوبتة كمان حاجة مهمة لازم نذكرها وهى التعرض للأتربه والهواء . ثالثا – قلة أكل الخضار والفاكهه وعدم شرب كميات كافيه من المياه على مدار اليوم بيفقد الشعر غذائه الطبيعى وبيؤدى إلى جفافه  وبيتسبب فى الهيشان والتقصف وخلافة .حاجه كمان لازم ناخد بالنا منها وهى أن الأكلات السريعه والوجبات الجاهزه ليها أثر سلبى جدا على البشره والشعر فياريت نحاول نقلل من دا قدر المستطاع وكمان فى كتير أدويه بناخدها أثناء مرض مثلا بيكون من أثارها الجانبيه نزول الشعر .وكمان مننساش عامل مهم جدا فى الموضوع دا وهو العامل النفسى  فطبعا أكيد كلنا عارفين إن الحاله النفسيه السيئه بتتسبب فى نزول الشعر بغزاره وعلشان كدا لازم تاخدى بالك جدا من النقطه دى وتحاولى تحسنى من مودك باى طريقه زى مثلا هوايه نشاط بتحبى تمارسيه أو ترفيه من أي نوع . كدا إحنا إستعرضنا معظم الأسباب إلى بتؤدى لمشاكل الشعر  ودلوقتى هقولكوا على ماسكات تحفه للشعر هتفرق كتير معاكوا فى حل المشاكل دى   بس قبل أي وصفه هطلب منكم حاجه بسيطه علشان تنشيط الدوره الدمويه فى فروة الرأس  عايزاكوا كل يوم تعملوا مساج باطراف الاصابع على فروة الراس باستخدام زيت الخروع أو زيت اللوز خلوها عاده يوميه علشان تحسنوا من صحة شعركوا وإتاكدى إن الزيت إلى هتستخدميه فى المساچ دا هيوصل لكل فروة شعرك ودلوقتى خلينا نبدأ مع الوصفات :**وصفة البيض وزيت اللوز مع الموز : هاتى ثمرتين موز وإهرسيهم كويس جدا وأخلطى عيهم بيضه مع ربع كوبايه من زيت اللوز  وإضربيهم كويس فى الخلاط وبعدين طبعا هتكونى غاسله شعرك ومنشفاه كويس وتفردى الخليط على الشعر لمدة ساعتين  وبعدها إغسليه كويس وشوفى النتيجه إلى هتظهر من أول مره   إعملى الماسك دا مره كل إسبوع ولاحظى تحسن كبيير فى صحة شعرك لأنها وصفه غنيه جدا بالبروتين ألى بيحتاجه الشعر التالف علشان يرجع لطبيعته .**الوصفه التانيه هى وصفه خليط الزيوت مع العسل الابيض  : هاتى مقدار من زيت الخروع ومقدار من زيت الزيتون وزيت اللوز الحلو واخلطيهم مع بعض وبعدين ضيفى عليهم معلقتين  كبار من عسل النحل واغسلى شعرك كويس جدا ونشفيه وبعدين استخدمى الخليط على شعرك لمدة نص ساعه وبعدين اغسليه مع التكرار شعرك هيكون انعم كتييير وكمان هتتخلصى من الهيشان .
**ومن الوصفات المجربه لتكثيف الشعر والتخلص من التقصف وصفة الصبار مع مسحوق الحلبه : : هتجيبى صبار وتخادى الجل الموجود جواه مع فنجان صغير من زيت الخروع وحلبه مطحونه ناعم جدا  واخلطيهم كويس اوى وبعدين حطى الخليط على فروة شعرك قبل ما تنامى وبعدين نامى بيها  وتانى يوم اغسلى شعرك وكررى الماسك دا  مره فى الاسبوع وهتلاحظى اد ايه شعرك بأه اقوى واكثف من الاول . دى وصفات بسيطه اتمنى انكوا تجربوها وان شاء الله تخلصكوا من مشاكل الشعر كلها .معلومه بأه مهمه جدا لازم تعرفوها  فى ناس كيير بتاخد فيتامين ( أ ) بشكل تقريبا مستمر ودا بيتسبب فى نزول الشعر فخلوا بالكوا وكمان نقص الزنك فى الجسم بيضعف الشعر جدا وبخليه يتساقط  اتمنى اكون قدرت افيدكم واستنونى مع موضوع جديد يهم كل ست مع ياسمين وبس …..

Leave A Comment?