لعيون اجمل ورموش اطول

مساء الفل عليكوا وحشتونى جدا زى ما وعدتكم امبارح النهارده هنكتب فى موضوع كتيير منكم طلبه منى وهو العين ومشاكل العين 
اول حاجه خلينا نعرف مع بعض ايه هى مشاكل العيون وايه اسبابها وبعدين هنتكلم عن طرق علاج المشاكل دى من وجهة نظر افضل دكاترة الجلديه هنتكلم كمان عن عادات غلط كتيير مننا بيعملها من غير ما يكون عارف الاثر السيئ ليها على عيننا وعلى الجفون والرموش ومناطق اسفل واعلى العين  وكمان عن عادات صحيه جدا للعين وبسيطه ممكن نخليها عاده يوميه علشان نتخلص نهائيا او نقى نفسنا من مشاكل العين
مبدئيا من اهم مشاكل العيون الاتى
اول حاجه طبعا والى تعتبرمن اهم مشاكل البشره عموما هى الهالات السودا ودى كتيير مننا بيعانى منها وبردو كتير مننا بيجرب ليها حلول كتييره وللاسف بردو بتفضل مستمره وهنتكلم مع بعض عن اسباب الهالات السوداء بعد طرح باقى المشاكل
تانى مشكله بيكون شكلها وحش جدا وبيضايقنا هى انتفاخات تحت العين
ثالثا من المشاكل المنتشره بردو خطوط اسفل العين
كمان عندنا تجاعيد الجفون
ومننساش نذكر كمان احمرار اسفل العين
وايضا تقشير اسفل العين
وحاجه مهمه بردو بتأثر على شكل العيون وهى الرموش الخفيفه او تساقط الرموش
دى تقريبا كل المشاكل الى بتؤثر على شكل العين جدا  
بعد ما قولنا ايه هى المشاكل خلينا نتكلم عن الاسباب لان مجرد معرفه السبب جزء كبيير من العلاج
مبدئيا الهالات السودا ايه سببها؟ اقولكوا انا باه المنطقه الى هى اسفل العين دى تعتبر من ارق مناطق الجلد فى الجسم علشان كدا اول منطقه بتعكس حاله الجسم هى اسفل العين يعنى مثلا مرهقه شويه تحت عنيكى هيسمر  عندك انيميا تحت عنيكى هيسمر مش نايمه كفايه بردو تحت عنيكى هيسمر جسمك ناقصه فيتامينات ناقصه ترطيب مش بتشربى ميه كفايه بتشربى منبهات كتييره ومقضياها سهر تحت عنيكى لازم يسمر وكمان مننساش العامل الوراثى وهفهمكوا يعنى ايه العامل الوراثى بعدين كمان استخدام النظاره بيسمر تحت العين وممكن جدا يكون سبب فى الانتفاخات وخلافه طبعا دا غير النظر لفترات طويله للتى ڤى او الكمبيوتر او الاب التاب الموبايل وخلافه
وحاجه بأه مهمه جدا بتكون سبب فى معظم مشاكل العين وهى كريمات العين الغير مناسبه وطبعا الكونسيلر وطرق التدليك الخاطئه الى بنمارسها على المنطقه دى  
كمان لازم نعرف ان قلة الاهتمام بتنظيف العين من الميك اب زى الكحل والايشادو والماسكرا عامل رئيسى  من العوامل المسببه لمشاكل العين باكملها
كمان حاجه مهمه بردو وهى مشاكل الجيوب الانفيه الموضوع دا بيسبب ضمور لوصول الدم لهذه المنطقه ودا بيؤدى لاسمرارها طبعا كدا احنا استعرضنا مع بعض الاسباب  خلينا بأه ننتقل مع بعض للسلوكيات الخاطئه الى ياإما بتسبب للعين مشاكل ياإما بتزودها ايه بأه هى السلوكيات دى ؟
اقولكوا ؛مبدئيا كدا طرق التدليك الغلط :معظمنا لما بيجى يستخدم كريمات او زيوت لمنطقة اسفل العين بيدلكها ودا سلوك غلط بيسبب تجاعيد وخطوط فى المنطقه دى تانى حاجه دعك العين نفسها عاده سيئه وسلوك غلط جدا لان زى ما قولنا المنطقه دى من ارق مناطق الجلد فى الجسم وضع ميك اب لفترات طويله على عنيكى شئ غلط بيرهق الجلد وممكن يؤثر على صحة النظر وياريت لما تستخدمى ميك اب للعين بالذات يكون اوريجنال مش اى حاجه والسلام لازم تتجنبى تماما الادوات الرخيصه سلوك بأه بيعد كارثه لوحده وهو التجارب الكتيير الى بنعملها على المنطقه دى كل شويه حد يقولك وصفه او ماسك معين وللاسف بنجرب ونجرب ونجرب لحد ما بتسوء الحاله او بتظهر مشكله جديده على سبيل المثال النشا والبطاطس الحاجات دى غلط جدا على المنطقه دى ومع ذلك كتير بيعملوها وللعلم الحاجات دى الجلد بيتشرب اللون الابيض الى فيها فقط وبيستمر تحت الجلد كام ساعه وشكرا بس للاسف بتسبب جفاف المنطقه دى وشويه شويه بتظهر تجاعيد وخطوط رفيعه  فيارييت بلاش لو سمحتوا كل حاجه نسمعها نجرى نجربها المكان دا جلده رقيق جدا مش بيحتمل كل التجارب دى حافظوا على بشرتكوا شويه طبعا السهر والمنبهات الكتير ومشاهده اى جهاز لفترات طويله سلوكيات خاطئه وبتضر بصحة العين جدا
خلينا بأه نعرف بعض السلوكيات السليمه الى بتساعد على حل مشاكل العين وكمان بتقي منها اصلا
اول حاجه وضع اى كريم او كونسيلر لازم يكون عن طريق الطبطبه مش الدعك
كمان دعك اسفل العين من بره لجوه بيسبب تجاعيد بلاش كدا لو مضطره للدعك يبقى من جوه لبره
اعملى مساج خفيف لعنيكى كل يوم عن طريق حركه دائريه بسيطه عل العين نفسها يعنى لا تحتها ولا فوقيها
نشطى الدوره الدمويه لعنيكى مره على الاقل كل يوم باستخدام قطعة تلج ملفوفه فى قماشه ومشيها حول العين ويفضل مرتين تلاته كل يوم
لما تيجى تستخدمى حاجه لعنيكى استخدمى افضل واغلى حاجه بلااااااش الرخيص
كلى خضار كتير على قد ما تقدرى دا مفيد جدا لكل بشرتك مش بس لعنيكى
نامى بدرى واصحى بدرى لان السهر جزء كبير من المشكله
اشربى ميه كتير علشان صحة جلدك عامة
كلى كوبايه زبادى عليها معلقه عسل كل يوم وشوفى اد ايه هتفرق فى صحة بشرتك كلها
اشربى كوبايه شاى اخضر كل يوم وياريت تاكلى تفاحه كمان بس كدا دى الحاجات الى لو عملتيها هتعالجى نفسك بنفسك صدقينى مفيش اى داعى لكل الكريمات والماسكات وخلافه كل يوم والتانى اهتمى بس بالحاجات دى وشوفى بنفسك النتيجه
عايزه كمان اقولكوا على حاجات مش حلوه ابدا للمنطقه دى وبلاااش بلييز تعمليها ماسكات لتحت عنيكى
الليمون ،النشا، لبن نيدو ،الرده ،الترمس ،ماء الورد، البيض،   الجلسرين  ،الكركم
تمام كدا تمام 
نفهم بأه يعنى ايه عامل وراثى او هالات بالوراثه  دا معناه ان الجلد عند الناس دى بيكون صعب يجدد نفسه بنفسه بس مش مستحيل وكمان معناه ان لو حتى السبب الى بيؤدى للهالات زال بيستمر السمار بردو بس مش معناه ابدا اننا بنكون مولودين بيه او انه بيستمر طول العمر الحكايه كلها انه بياخد فتره علاج اطول يعنى مثلا فترة علاج الهالات فى الطبيعى من شهر لتلاته لكن مع وجود العامل الوراثى بيكون من تلاته لست شهور اخر حاجه هتكلم معاكوا فيها النهارده هى صحة الرموش
طبعا كلنا عارفين فوايد زيت الخروع لتكثيف وصحة الشعر والرموش هاتى زيت خروع وضيفى عليه معلقه زيت فيتامين  e  واستخدمى الخليط دا على رموش نظيفه كل ليله لمدة شهرين لتلاته
كمان ممكن تستخدمى زيت الزيتون لانه غنى جدا بفيتامين  e او ممكن تضيفيه على زيت الخروع وياريت يابنات تخلوا بالكوا من الماسكرا والكحل الى بتستخدموها علشان فى انواع رديئه بتوقع الرموش استخدمى حاجه اوريجينال بليز
وطبعا لازم تستخدمى مزيل ميك اب خاص بالعين علشان متتسببيش فى ارهاقها ولو مش متوفر دا نضفى عنيكى من الميكب باللبن
بكدا نكون خلصنا موضوع النهارده استنونى بكره مع موضوع جديد يهم كل بيت مع ياسمين …….

Leave A Comment?