البسى الى يناسبك

مساء الخير عليكم رجعتلكوا مره تانيه وموضوع جديد من موضوعاتنا الى اتمنى تكون بتعجبكوا يارب
موضوعنا النهارده عن ازاى تلبسى او بمعنى اوضح ازاى تختارى اللبس الى يتناسب مع شكل جسمك وطبعا دا شئ فى غايه الاهميه لاننا كتير او فى المعظم بنختار لبسنا على حسب شكله وبس من غير ما يكون عندنا خلفيه او علم بايه مناسب وايه لا ايه احلى ويبرز جمال جسمنا وايه ممكن يبين ديفوهاتنا
طبعا فى مننا القصير وفى الطويل وفى الرفيع وفى التخين لكن كل جسم له شكل معين مثلا فى اجسام على شكل تفاحه وفى على شكل الخوخ وهكذا وهشرحلكوا ازاى تعرفى شكل جسمك سجلوا معايا الى تلاقوه بينطبق عليكوا وقبل ما تروحى تشترى لبس بصى فى الورقه الى سجلتى فيها الى هتعرفيه النهارده من ايه القصات المناسبه ايه الالوان الى تكون حلوه عليكى وايه النقشات الافضل لشكل جسمك خلينا نبدأ مع بعض بأول شكل وهو الخوخ /
صاحبات الجسم دا بيتميزوا بصغر الجزء الاعلى من جسمهم وكمان بيميزهم خصر محدد ولكن الجزء الاسفل بيكون بارز او ممتلئ
طيب ايه بأه هى الاوان الى بتتناسب مع الفئه دى سجلوا معايا
يفضل الالوان الفاتحه للجزء العلوى زى مثلا الابيض والبمبى وخلافه من الالوان الفاتحه وممكن تختارى جيب او بنطلون غامق اللون للمنطقه السفلى من الجسم
وعلى فكره ممكن كمان يختاروا الوان متكونش غامقه جدا ولا فاتحه جدا لو فستان مثلا طيب خلينا ندى امثله لحاجات تكون شكلها حلو جدا للفئه دى مثلا الچواكت / الجاكت الطويل الواسع بيكون تحفه على شكل الجسم دا 
كمان الجواكت الرياضيه زى الاديدس وخلافه بتكون مناسبه جدا
بالنسبه للاكمام بيفضل الاكمام الطويله بس دا فى الجواكت وبس
بلاااااش الجواكت المنتفخه بتكون مش حلوه ابدا فبلاش منها افضل
طيب لو هتلبسى شيميز او توب تختارى ايه ؟
اقولك ياستى تختارى الى فتحته بتكون على شكل دائره علشان يدارى الرفع فى الجزء العلوى وكمان يفضل الشكل دا يكون بدون اكمام اما المحجبات ممكن تلبسى بدى بلون مختلف علشان تبرزى الزراعين او تلفتى النظر ليهم اكتر وكمان ياريت لو هتختارى شيميز يكون منقوش او فيه كشكشه مثلا الحاجات دى بتدى حجم للجسم وبتظبط الشكل جدا للفئه دى تمام كدا طيب لو عايزه تجيبى بنطلون ؟ يفضل تشترى بنطلون واسع من تحت مش واسع اوى ولكن مش ليجن مثلا او سكينى وبلاش البنطلون المنقوش وبالاخص الى عليه كاروهات
اما لو جيب يفضل الى بتكون على شكل حرف A
وممكن كمان الجيب الكالوش بس الكالوش الخفيف الى بتكون واسعه من الاسفل ولكن بقدر معقول بلاش الواسعه اوى اوى علشان بتدى حجم
كمان كام حاجه كدا حاولى تعمليها اولا اختارى الوان غنيه بدلا من الالوان الصارخه مثلا بدل الحمر الوردى افضل
اختارى المقاس المناسب بلاش الضيقه جدا وبلاش بردو الواسعه جدا
حاولى تلبسى كذا طبقه فى الجزء العلوى مثلا ممكن توب او شيميز وعليه چاكيت
دا كدا فى الى يخص الاجسام الى على شكل خوخ
ثانيا بأه الاجسام الى بتكون على شكل مسطره / الى جسمهم على شكل مسطره بيتميزوا بجسم صغير الحجم سواء فى الجزء الاعلى او الجزء الاسفل
الالوان المناسبه للجسم دا هى
الاخضر الزيتونى او الزيتى بدرجاته
الاخضر التفاحى
الدهبى المحمر او لون الصدأ
اللون البتنجانى
اللون الابيض كمان بيكون حلو جدا للجسم دا بس مش لون الحليب او مش اوف وايت الابيض الناصع فقط بيكون حلو طيب ايه بأه نوع الجواكت المناسب للجسم دا ؟
اول حاجه لازم لازم يكون مقاسه مناسب جدا يعنى مظبوط على الجسم مش ضيق ومش مبهدل
تانى حاجه بلاش الجواكت ال كلها زراير اختارى الى بيكون فيها زرار واحد فقط فى نص الجاكيت طيب لوشيميزات او توب
خلى لون الشيميز او التوب افتح درجه واحده من البنطلون او الجيب
فتحه الرقبه لازم تكون دائريه او رقبه عاليه تغطى الرقبه
بردو يفضل الى بتكون بدون اكمام
وبردو لازم يكون المقاس بالظبط مش الضيق او الواسع طيب نيجى بأه لو هتختارى بنطلون او جيب
اول حاجه البنطلون اختارى مقاسه مناسب وواسع شويه من تحتالجيب بأه بردو يفضل الى على شكل A ودا افضل وانسب اختيار لشكل الجسم دا
نيجى بأه لشكل التفاحه  الناس الى جسمها على شكل تفاحه بيتميزوا ببروز المنطقه العليا من جسمهم وكمان باكتاف عريضه اما الخصر بيكون قصير اما المنطقه السفلى بتكون رشيقه مش ممتلئه اوى ومش رفيعه بيتميزوا كمان بارجل جميله ورشيقه جدا  
ايه بأه هى الاوان المناسبه للفئه دى
عندنا اللون الازرق الملكى بيكون حلو جدا
كمان اللون الازرق البحرى بردو مناسب جدا
وفى كمان عندنا التركواز بيكون جميل جدا جدا على شكل الجسم دا
اللون العنابى بيكون تحفه
وكمان اللون البنفسجى بيكون مناسب جدا
وكمان عندنا اللون البنفسجى المحمر مناسب وشيك جدا
درجات الاخضر الغامقه بتكون واااو جدا على شكل التفاحه وبجد شيك اوى كمان زى ما فى الوان بتكون حلوه على شكل التفاحه كمان بردو فى الوان بتكون مش حلوه ابدا والالوان دى هيا /
اللون الاخضر الزيتونى او الزيتى مش حلو ابدا للجسم دا تجنبوها تماما
الالوان الفاتحه اوى والصارخه مش حلوه بردو بليييز بلاش منها ابدا اختارى افضل الالوان الغنيه او الغامقه بتكون انسب واشيك كتيير للشكل دا بالاخص طيب نيجى بأه لشكل الجاكيت المناسب ايه هو ؟ الجاكيت يفضل يكون ضيق عند الوسط وبيصل لاول الفخد
كمان يفضل يكون بدون ياقه ويفضل يكون فيه سوسته
طيب لو شيميز او توب
مينفعش توب واسع للفئه دى افضل يكون مناسب او ضيق قليلا
فتحه الصدر تكون دائريه عميقه او بشكل سبعه ودول افضل اختيارين
بلاش اى حاجه فيها ياقات سواء چواكت او شميزات او فساتين
يفضل انك متلبسيش كت ممكن تلت ارباع كم بيكون مناسب جدا لشكل الذراع ويعد دا افضل اختيار اما بالنسبه للبنطون المناسب لشكل التفاحه فهو الى بيبدأ من عند عظمة الفخد او فوقها بقليل
يفضل كمان يكون واسع من اسفل ومش واسع جدا خلى بالك علشان الهدف هنا من الوسع انه يوازن الجزء الاسفل من جسمك بالجزء العلوى وبس
كمان خلى بالك اى حاجه تلبسيها فى الجزء العلوى لازم تكون ضيقه من عند الوسط علشان تبرزه

اما عن الجيب المناسب للاجسام دى هى الجيب الكالوش بتكون تحفه جدا ودا انسب اختيار بردو
تعالوا بأه نعرف مع بعض شوية معلومات عامه ناخد بالنا منها كويس علشان نختار ديما الانسب مهما كان شكل جسمك  واتمنى تنفذوها كلكم
البناطيل الضيقه من اسفل الرجل مشروع فاشل لاى شكل جسم زى الليجين والاسكينى مثلا لانه بيدى للرجل شكل اقصر من طولها الطبيعى لو عايزه شكل افضل البسى البنطلون الى بيكون واسع شويه عند اسفل الساقين حاولى ديما تلبسى الالوان مع نفس الالوان يعنى مثلا بلاش الوردى مع الاسود شكله بيكون مش حلو ابدا
بلاش كمان تلبسى البنطلون الجلد مش حلو ابدا
بلاش اى ملابس تلزء على الجسم بتكون مش لطيفه ابدا وكمان بتبرز اى ديفوهات موجوده البسى ديما المقاس المناسب وبس يعنى لا واسع ولا ضيق الشوز المناسب شئ مهم جدا مثلا الشور الى المقدمه بتاعته على شكل سبعه بيدى شكل اطول للرجل كمان لو عندك الكاحل كبير او ممتلئ بلاش الشوز الى فيه ربطه للكاحل البنطلون الواسع بيديكى شكل انحف والضيق بيديكى شكل  اسمن
لو رقبتك قصيره بلاش تلبسى قميص او توب بيغطى الرقبه البسى حاجه بفتحه  على شكل سبعه او مفتوحه شويهلو كتافك عريضه والجزء السفلى من جسمك رشيق البسى جيب كلوش تكون واسعه يعنى من اسفل لو جسمك بشكل الخوخ اختارى جاكيت بينتهى عند الوسط او بينتهى عند الركبه ومش فى اى اماكن تانيه
كمااان بلاش بليز تحطى مكياج مبالغ فيه خليكى بسيطه وحاول تركزى فى الميك اب على اما العين او الشفايف بلاش الاتنين مع بعض
حاجه بأه اخيره ياريت زى ما بتراعى تنسيق الالوان راعى راحتك اولا قبل اى شئ تانى لانها الاهم طبعا
اتمنى اكون قدرت افيدكم النهارده بموضوعنا دا واستنونى فى موضوع جديد مع ياسمين ……..

Leave A Comment?