مع طفلك

مساء الورد على كل متابعى مع ياسمين اتمنى يارب تكونوا جميعا بخير
اليوم هنتكلم فى موضوع حيوى جدا جدا بيحصل جوا كل بيت وكلنا محتاجين نتكلم فيه ونفهم ايه صح وايه غلط موضوعنا النهارده خاص باطفالنا واسلوب تربيتنا ليهم  سلوكيات غلط بنقع فيها وبتأثر عليهم بالسلب وردود افعال غير مناسبه اما اضعف من المطلوب او اقوى وكمان كلمات بتهز ثقه اولادنا فى نفسهم وافعال بتخليهم متواكلين وغير مسؤولين تابعوا معايا موضوع النهارده بجد هتستفيدوا كتيير
خلينا نتكلم مبدئيا عن حاجات منتشره بنعملها كلنا وبنكون فاكرين اننا بكدا بنهذب سلوكيات اطفالنا
اول حاجه بتحصل كتير فى كل بيت هى عدم اتفاق الوالدين على اسلوب تربيه واحد مثلا انا كأم وعدت بنتى خلصى واجباتك وهيكون فى حاجه حلوه مستنياكى من مامى يجى بابا ويديها الحاجه الحلوه دى بدون ما تخلص واجباتها دا غلط غلط غلط اطفالنا اذكى مما نتخيل وممكن جدا يستغلوا النقطه دى مثلا مامى عايزه العب شويه وبعدين هبقى انام بعدها  انا لا حبيبتى دا معاد نومك تجرى على بابا بابا عايزه العب شويه وبعدين هنام بابا اوك وبكدا بتكون حققت الى هيا عيزاه عن طريق انها تتطلب من الشخص الى بيوافق اكتر حتى لو دا ضد رغبة الطرف التانى وكمان بيكون الطرف الرافض فى وجهة نظرهم معقد ودمه تقيل ومش بيحبهم كمان  فلازم قبل اى شئ وضع برنامج يكون متفق عليه من قبل الام والاب على اسلوب تربيه واحد بدون خلافات امام الطفلتانى حاجه بأه ودى كوميديا الحقيقه هى اننا كاآباء مش بنكون ملتزمين باسس التربيه الى بنحطها لاولادنا مثلا ممنوع الكذب ونكذب احنا قدامهم ممنوع السهر ونسهر مينفعش نأجل حاجه علينا ونأجل طبعا دا بيهز ثقة طفلك فيكى جدا فخلوا بالكم اى حاجه هو ملزم ميعملهاش انتوا كمان لازم تلتزموا بعدم فعلها على الاقل ادامه ثالثا مين فينا مبيقولش الجمله دى لو عملت كذا هتاخد شوكولاته مثلا لو خلصت اكلك هتاخد حاجه حلوه لو خلصت واجبك هجيبلك لعبه  السؤال بأه ياترى هنقدر بعد كل وجبه نجيب حاجه حلوه ولا بعد كل واجب نشترى لعبه اكيد لا يبقى افضل انك تكافئى طفلك معنويا بمعنى انا مبسوطه منك جدا لانك خلصت كل اكلك  انت النهارده كنت شاطر جدا جدا واحنا بره البيت ممكن كمان تعملى اجنده ومع كل حاجه بيعملها صح تحطى نجمه كتشجيع وممكن بعد مثلا ٥٠ نجمه تشجعيه بحاجه حلوه او هديه رابع حاجه هى التهديد بدون تنفيذ بمعنى انك طول الوقت تفضلى تهددى طفلك لو معملتش كذا هتتعاقب ومش بتعاقبيه الطريقه دى بتربى جوا الطفل شعور بضعفك اماماه وبتخليه يتحداكى مع الوقت  مثلا كفايه تابلت وقوم نام لو حسيتى بتجاهل حذريه مره واحده فقط يعنى لو مش طفيت التاب وقمت تنام هاخده ومفيش بكره تاب ونفذى كلامك فورا لو لقتيه اهمل تحذيرك ليه
خامس حاجه كلمة هتشوفى هعمل فيكى او فيك ايه مينفعش تخلى طفلك يفضل مستنى عقابه لان دا بيحسسه بقسوه وبيخليه ينفر منك اذا اخطأ عاقبيه فورا متستنيش وتفضلى تهدديه خامسا  انك تفقدى اعصابك ادام طفلك شئ مش فى صالحك او صالحه او فى صالح علاقتكم ببعض وطبعا لاننا بشر وممكن جدا نوصل لحاله صعب نتماسك فيها فالحل هنا انك اول ما تحسى انك هتفقدى اعصابك امام طفلك ادخلى اوضك واقفلى على نفسك خمس دقايق لحد ما تهدى علشان تقدرى تتحكمى فى رد فعلك وكمان تتعاملى معاه بحكمه اكبر حاجه اخيره بأه بنقع فيها كلنا وهى الشرح الكتيير عن ايه صح وايه غلط ودا بيخلى الطفل يحس ان الشئ الصح شئ مملل حاولى وانتى بتعلمى طفلك تختصرى جدا جدا

دا بالنسبه للسلوكيات الخاطئه نيجى بأه لحاجات اطفالنا بيعملوها وازاى نقدر نعالجها زى مثلا العياط على كل حاجه عايزها وهنا بنكون لازم ناخد موقف تجاه الفعل دا والموقف الصح هنا او رد الفعل الصحيح هو التجاهل تماما لحد ما يخلص كل الى عنده وبعد لما يخلص نفهمه اننا مكناش بنرد لانه كان بيعيط ودا سلوك غلط ونسأله ها كنت عايز ايه بأه حاجه كمان بتحصل بردو كتير من اطفالنا وهى المقاطعه اثناء الكلام هنا لازم نتعامل بهدوء اول لما يقاطعنا الطفل فورا نطلب منه الانتظار لحين انتهاء الحديث ونطلب منه ميحاولش يقاطعنا تانى  فعل كمان بردو بيكون مزعج جدا لينا كآباء وهو تلفظ الطفل بالفاظ غير مناسبه ودا طبعا لانه بيكون فى سن بيقلد فيه كل شئ دون وعى وهنا لازم نفرض على الطفل عقاب اذا كرر اللفظ تانى مثلا صندوق صغير يحط فيه جزء من مصروفه لو قال حاجه غير مناسبه وهكذا ننتقل دلوقتى لبعض الكلمات الى بنستخدمها وللاسف بتدمر نفسية اطفالنا
لما كنت فى سنك كنت كذا كدا احنا بنحسس الطفل اننا كنا افضل وانه فاشل
اخوك احسن منك   الكلمه دى بتثير الغيره فى نفس الطفل وبتهز ثقته فى نفسه
علشان احبك اعمل كذا الكلمه دى بتدى الطفل شعور بعدم الامان لان هنا انتى بتربطى حبك ليه بافعاله لو عمل كذا هتحبيه لو معملش كذا هتكرهيه ودا بيدمر نفسيته
تعالو باه نعرف ممكن نعمل ايه علشان نعزز ثقة الطفل بنفسه
اول حاجه لو ابنك عمل حاجه مهما كانت صغيره لازم تكون عظيمه بالنسبه ليكى ولازم تقولى انك فخوره بيه
كمان عوديه يختار بنفسه ملابسه مثلا وقوليله ان ذوقه حلو جدا
كل طفل له هوايه شوفى ايه هوايه طفلك لو مثلا الرسم هاتيله علبه الوان ولفيها كهديه وفاجيئيه بيها وقوليله دا علشان انت رسمك يجنن
خدى رايه ديما فى بعض الامور مثلا ايه رايك نغير لون الحيطان  لايه ايه رايك نخرج فين المره الجايه
خليه يشاركك فى امور البيت مثلا يرص السفره او يساعدك فى شيل الاطباق وهكذا
لما تتكلموا فى موضوع ايا كان سياسى مثلا خدى رايه وابدى اهتمام كبير بكلامه وبكدا يكون خلص موضوع اليوم اتمنى اكون قدرت افيديكم وطبعا مستنيه ارائكم وانتوا كمان استنونى بكره مع موضوع جديد مع ياسمين……..

Leave A Comment?