اهم نصايح لنفسيه افضل

مساء الخير على كل متابعينى اهلا بيكم معايا فى موضوع جديد مع ياسمين
موضوعنا النهارده مهم جدا جدا بالنسبه لكل بنت وست وخاصة اذا كانت بتحمل مسؤوليات سواء زواج او امومه او شغل
النهارده هقدملكوا نصايح مهمه جدا لتحسين نفسيه المرأه
طبعا كلنا عارفين ان المرأه بطبيعتها نفسيتها متقلبه وكمان شديده الحساسيه وذات مشاعر رقيقه جدا ودا بيعرضنا لضغوط كتييره اوى حاجات بسيطه من وجه نظر النصف الاخر بتأثر جدا فى نفسيتنا بالسلب طبعا وكمان ضغوط الحياه من عمل وعلاقات اجتماعيه وخلافه كل دى اسباب بتؤدى احيانا للتوتر والقلق والحزن واحيانا الاكتئاب
علشان كدا حبيت اكلمكوا النهارده عن ازاى نحسن من نفسيتنا وازاى نكون سبب رئيسى فى اسعاد انفسنا ودا طبعا من وجهة نظر اطباء متخصصين
/اول حاجه هكلمكوا عنها فى موضوعنا النهارده مهمه جدا وكتير مننا كسيدات بيغفلوا عنها بسبب البيت والاولاد وخلافه من مسؤوليات ملئ يومنا كله وهى التواصل مع المجتمع والناس 🙂
         والمقصود هنا اكتر من شئ
اولا التواصل بمعنى مشاركة المشاكل ان وجدت مع شخص قريب بدرجه كافيه يتميز بالامانه لان ببساطه مجرد مشاركة المشكله مع اخرين يخفف من حدة الموقف بشكل كبير ومش بس كدا كمان مشاركة مشاكلك مع اخرين بيساعدك على الرؤيه الصحيحه للموقف وعدم تضخيم الامر  وكمان بيساندك علشان تقدرى تتعاملى مع الأمر بقوه وتحدى اكبر بكتير من مواجهته لوحدك
تخيلى كدا لو انتى لوحدك فى كل مشاكلك ومش بتشاركى اى شخص فيها متخيله اد ايه هتكونى مفتقده للدعم النفسى الى يساعدك على التفكير السليم والرؤيه الصحيحه ثانيا التواصل بمعنى ممارسة الانشطه مع الاصدقاء مثلا  الى بتساعد على الاسترخاء وابسط الانشطه دى التحاور والتناقش وعلى فكره مجره الضحك مع الاصدقاء بيفرغ كتيير من الطاقه السلبيه الموجوده جوانا بفعل المشاكل والضغوط والروتين وخلافه
كمان السؤال عن حل
للمشكله او التفكير فى حلول مع احد الاصدقاء خيار اصوب من التفكير المنفرد فى حلول
/ تانى نصيحه فى موضوعنا النهارده هى
🙂 الحرص على الايجابيه بمعنى انك لازم تبصى لنص الكوبايه المليان اولا قبل ما تفكرى تبصى للنص الفاضى لازم تفهمى ان لولا وجود الحزن ما شعرنا بمتعة السعاده 
شوفى ايه فى حياتك كويس عدى نعم ربنا عليكى الى كتير غيرك ممكن يكون محروم منها بس دا مش معناه ابدا انك ترضى بالقليل وتقولى عندى كتير بصى للايجابيات علشان تخفى الضغوط من على عقلك فتقدرى تكملى بسهوله اكبر
طيب ازاى تقدرى تكونى ايجابيه اكتر دا ممكن يتحقق لما تشتغلى على نفسك شويه تدربى نفسك على تقبل الامور بروح رياضيه كمان خليكى واثقه فى نفسك دا بيخليكى عندك شعور بالرضا والايجابيه تحت اى ضغط وممكن تعملى حاجه حلوه اوى هاتى ورقه وقلم واكتبى كل الحاجات الحلوه الى مريتى بيها فى حياتك واكتبى تحتها اد ايه انا  ربنا بيحبنى  لما تشعرى بالسلبيه بصى فيها استمدى منها طاقه ايجابيه وصدقينى بتفرق جدا

/ تالت حاجه لازم تعمليها علشان نفسيتك تكون مرتاحه
🙂 تقبل الامور التى لا امل فى تغييرها / عادى لما تلاقى ان فى امور غير قابله للتغير مع  كم المحاولات لتغيرها الى بتبوء بالفشل طبعا حاولى تتصرفى بذكاء علشان متتعبيش على الفاضى  اكثر الامور ذكاءا هنا هى تقبل الامر كما هو
لازم تعترفى بروح رياضيه انك فشلتى فى تغيير هذا الامر وبأنه سيظل هكذا مهما حاولتى ودا مش معناه انك انسانه فاشله ابدا دا معناه ان الاسلوب فى التعامل مع الامر خاطئ فقط مثلا بدلا من محاربته يفضل تقبله كما هو او تجنبه ان كان يسبب لكى الضرر 
رابع نصيحه هى خليكى نشيطه ديما
🙂 النشاط هنا وسيله لتفريغ بعض من التوتر النفسى او القلق الى بتعانى منه زى مثلا المشى او ممارسة التمارين الرياضيه او الرقص  ودا شئ معروف فى الطب النفسى ان النشاط البدنى ممكن جدا ان يؤدى الى تصفية الاذهان التخفيف من التوتر والقلق وخلافه ودا لما بيحصل بتكونى اهدى فبتقدرى تفهمى ايه الاسباب وتقدرى تفكرى فى حلول بشكل اهدى واصفى لان التعامل مع التوتر بشكل فعال بيحتاج الى الشعور بالقوه النفسيه
بس خلى بالك ممارسة التمارين الرياضيه لا تجعل التوتر يختفى ولكنها تخفف من حدته وتهذب الفكر ايضا مما يتيح لكى التعامل مع الامور بشكل اصفى وافضل
خامس نصيحه اتمنى تعملوا بيها لنفسيه افضل هى
🙂 ان لازم تمتلكى السيطره / الكلمه تبان كبيره وصعبه لكن حقيقة الامر غير ذلك
اعرفى كويس ان مهما كانت الامور صعبه فهناك دائما حل وان التفكير السلبى مجرد ترييح دماغ سورى طبعا على اللفظ ولكن دى الحقيقه السلبيه سواء كانت تفكير او فعل ما هى الا كسل وتواكل ليس الا ومجرد التفكير بشكل سلبى بيزيد جدا من حدة التوتر بصى للأمور بشكل إيجابى علشان تقدرى تسيطرى عليها قبل ما تخرج عن ايدك
مجرد شعورك بالسيطره على الامور بيدخلك فى حاله من التمكين ومش بس كدا لا كمان مجرد سيطرتك على الأمور جزء كبير من حلها فى الاساس اخر حاجه معايا النهارده هى
🙂 اكتساب ملكة التحدى / ودا شئ بينقذنى جدا من الانهزام الحقيقه
طيب دا ازاى نعمله 🙂 مثلا حطى لنفسك اهداف وياريت لو تكتبيها كمان زى مثلا انا هكمل دراسات عليا  او هتعلم لغه كمان او هتعلم رياضه جديده او هنقص من وزنى لانى بدأت افقد صحتى  دا شئ بيساعد جدا على بناء ثقتك بنفسك وكمان بيساعد تدريجيا على التخلص من التوتر
مع التحدى المستمر لنفسك فى الامور السلبيه هتحسى مع الوقت بالسيطره على مجريات حياتك ودا سبب قوى جدا للنجاح وكمان لنفسيه قويه تتحدى التوتر والقلق بكدا يكون خلص موضوعنا النهارده استنونى فى موضوع جديد مش هتلاقوه غير مع ياسمين تصبحوا على خير ……..

Leave A Comment?