حلو على اد الايد

مساء النور وحشتونى جدا رجعالكو بموضوع حلو جدا النهارده يارب بس يعجبكوا
النهارده جيبالكوا وصفات تحفه وبسيطه جدا جدا لحلويات واتمنى يارب تعجبكواان شاء الله
اول وصفتين مفيش اسهل من كدا بيتعملوا من البسكويت الساده ومش بياخدوا وقت ولا مجهود ولا حتى تكلفه كتير
اول وصفه معايا النهارده هى البسكويت بالمانجه سجلوا معايا المكونات
ِ عبوه كبيره بسكويت ساده او بالشوكولاته حسب الرغبه
ِ اتنين كيس كريم شانتيه
ِاتنين حبايه مانجو كبيره
ِكوب كبير لبن
ودى كل المكونات
الطريقه :/ اولا هنحضر الكريمه هنفضى العبوات فى وعاء عميق ونضيف عليها كميه مناسبه من اللبن ونبدأ نضربها بالمضرب لمدة 3 دقايق لحد ما يكون القوام متماسك وطبعا اللبن الى هنحضر بيه الكريمه بيكون ساقع
/تانى حاجه هنحضر المانجو يفضل قبل الاستخدام بساعتين مثلا تحطيها فى الفريزر وتخرجيها قبل الاستخدام بخمس دقائق بس علشان تكون متماسكه وتقدرى تقشريها بالسكينه زى البطاطس كدا وبعدين تقطعيها قطع وتضيفى عليها اربع معالق كبار من اللبن وتضربيها بالمضرب بردو لمدة 3 دقايق لحد ما تكون فى قوام الكريمه تقريبا ومتنسيش تعملى حسابك وتخلى كام قطعه كدا للتزيين
/هاتى صينيه صغيره وابدأى افرشيها بطبقة بسكويت وحاولى تكسرى كام بسكويته علشان تملى بيهم الفراغات بين كل بسكويته والتانيه
/ ضيفى نص كمية المانجو الى حضرتيها مسبقا وافرشيها كويس علشان تخلى كل البسكويت
/ ضيفى نص كمية الكريمه الى حضرتيها مسبقا بردو وافرشيها كويس وبالراحه علشان متختلطش مع المانجو
/ضيفى كمان طبقه من البسكويت الساده بنفس الطريقه ومتنسيش البسكويت المكسر لملأ الفراغات
/ضيفى الكميه الباقيه من المانجو كلها وافرشيها  كويس علشان تغطى كل البسكويت
/ ضيفى الكريمه المتبقيه كلها وافرشيها كويس على المانجو بحيث متختلطش معاه
بكدا تكونى حضرتى اول وصفه ويفضل بس التزيين ممكن بقطع مانجو وممكن بقطع موز وممكن بمسحوق كاكاو  وبعدين دخليها التلاجه ساعتين تلاته وبالهنا والشفا دا بالنسبه لاول وصفه نيجى بأه للوصفه التانيه وهى البسكويت بالنشا ودى المكونات
~ نشا
~ لبن
~بسكويت ساده عبوه كبيره
~ شوكولاته مطبخ
~ جوز هند للتزيين وممكن زبيب
الطريقه:/اول حاجه هنطبخ النشا ممكن بلبن وممكن بميه مع ظبط السكر طبعا وبعدين  تبرد  
/ نحضر الشوكولاته عن طريق عمل حمام ميه ليها هاتى حله وامليها ميه وحطيها تغلى على النار وحطى الشوكولاته فى اناء تانى وعرضيه للحراره الى طالعه من غليان الميه لحد ما تسيح
/  هاتى صينيه يفضل بيركس صغيره وافرشى طبقة بسكويت ساده الاول
/بعد كدا ضيفى نص كميه النشا المطبوخه وافرشيها كويس بحيث تغطى كل البسكويت وتملى الفراغات كمان
/ ضيفى طبقه من الشوكولاته على طبقة النشا وافرديها كويس
/ افردى عليهم تانى طبقه من البسكويت بدون ما تضغطيها
/ افردى باقى النشا بحيث بردو تملى الفراغات بين كل بسكويته والتانيه
/ ضيفى اخر طبقه من الشوكولاته وخلى بالك علشان متختلطش بالنشا
/زينى الوجه بجوز هند وزبيب وممكن فول سودانى
بكدا تكونى خلصتى وتدخليها بردو التلاجه لمدة ساعه مثلا وبالف هنا يارب  الوصفه الاخيره هى كيكه الليمون ومكوناتها
/دقيق
/ بشر قشر ليمون
/3 بيضات
/ بيكنج بودر وفانيليا او كيك شيف وفانيليا
/عصير برتقال
/ سكر
الطريقه : ضيفى البيض على عصير البرتقال ومعاه بشر الليمون وكمان الفانيليا والكيك شيف والسكر واضربيهم كويس فى الخلاط
ضيفى الدقيق بكميه مناسبه واضربى الخليط كويس مع بعضه لحد ما يكون القوام كويس مش متماسك ومش لين زياده
فى صينيه مناسبه حطى زيت وسخنيه على النار وبعدين نزليها من على النار وضيفى الخليط
هتكونى سخنتى الميكروويف شويه قبلها وتحطى الصينيه من نص ساعه لساعه الا ربع وبلاش تفتحى الميكروويف غير لما تنتهى المده ويبرد
ممكن تزينى الوش بجوز هند وبالف هنا وشفا بكدا نكون خلصنا موضوع النهارده واتمنى تجربوا الوصفات دى وان شاء تعجبكوا واستنونى فى موضوع جديد مع ياسمين

Leave A Comment?