افضل طرق لتخزين الاطعمه ….مجربه

مساكم ورد جميعا يارب اتمنى طبعا موضوعنا النهارده يعجبكوا واقدر افيدكم
النهارده هنتكلم عن حاجه جميله اوى تهمنى انا كست بيت واكيد تهمكوا معظم الوصفات الى هنقولها النهارده مجرباها بنفسى قبل ما اقولكوا عليها وطلعت حلوه جدا وبسيطه وصفاتنا النهارده هى وصفات لتخزين الخضار والفاكهه والحبوب كمان فى الفريزر لفترات طويله اول حاجه زى ما قلت قبل كدا ان تخزين الخضار والفاكهه واللحوم كمان شئ مهم لو عايزه توفرى فى مصروف البيت وكمان طبعا لو عايزه ترتاحى من تعب يوم بيوم
نضيف بأه على كلام قبل كدا ان التخزين كمان الحل الوحيد علشان تقدرى توفرى اكل بيتك فى غير الموسم بتاعه بدل ما تضطرى تشتريه من بره مجمد جمديه فى بيتك افضل وانضف هقولكوا كل الحاجات الى ممكن تخزنيها فى البيت بأبسط طرق ممكنه  ياريت بأه قلم وورقه وسجلى معايا
نبدأ بالخضار :
اول حاجه الباميه : فى طريقتين لتخزين الباميه اول طريقه /انك تنضفيها كويس وبعدين تغسليها بميه وشوية خل صغيرين وبعدين تقسميها فى اكياس وتشيلها فى الفريزر دا لو هتستخدميها خلال شهرين تلاته
لكن لو عايزه تخزنيها لفتره اطول يبقى اتبعى الطريقه التانيه / نضيفى الباميه واغسليها كويس وجهزى حله وامليها ميه وحطيها تغلى على النار وبعدين حطى الباميه فى مصفاه وحطيها فوق الحله وسيبها تتعرض لبخار الميه من دقيقتين لخمسه حسب الكميه مع التقليب وبعدين شيلى المصفاه وسيبها تبرد  وبس كدا قسميها فى اكياس كل كيس يكفى لطبخه واحده وشيلها فى الفريزر ومتنسيش تفرغى الهوا من الاكياس كويس جدا دا بيساعد على حفظ الاكل مده اطول تانى حاجه البسله نضفيها كويس وبنفس طريقة التخزين التانيه للباميه فى مصفاه وعرضيها للبخار الى طالع من الميه المغليه ويفضل انك تنضفى الجزر كمان وتقطعيه قطع صغيره وتضيفيه على البسله قبل ما تعرضيها للبخار وبعدين تحطيهم فى مصفاه وتعرضيهم للبخار لمده خمس دقايق مع التقليب وبنفس الطريقه سيبها تبرد شويه وابدأى وزعيها على الاكياس وفرغى الاكياس من الهوا وحطيها فى الفريزر الفاصوليا الخضرا هتتبعى معاها نفس الخطوات السابقه وبعدين حطيها فى الفريزر نيجى بأه للكوسه ودى لازم تتشال مقطعه مينفعش سليمه الطريقه اغلى ميه وحطى فيها معلقه ملح صغيره وبعد لما تجهزى الكوسه يعنى تغسليها وتقطعيها حطيها فى الميه المغليه لمدة دقيقه واحده وبعدين فورا شيلها بمصفاه وهتكونى مجهزه حله تانيه فيها ميه وتلج هتحطيها فيها لمده دقيقه بردو وبعدين هتصفيها فى مصفاه وتوزعيها على الاكياس وتحطيها فى الفريزر الباذنجان الاسود نفس طريقه الكوسه اغلى ميه بملح وحطى فيها الباذنجان المتقطع ودقيقه وشيليه وبعدين حطيه فى ميه بتلج وفى اكياس كل كيس على قد طبخه واحده وشيليها بعد لما تفضى الهوا كويس فى الفريزر نيجى بأه لحاجه مهمه جدا الطماطم فى كذا طريقه تخزنى بيها الطماطم 
اولهم انك تغسليها كويس وتشيليها حب سليم فى الاكياس
تانى طريقه تضربيها فى الخلاط وتشيلها فى الاكياس مضروبه
تالت طريقه تغسليها كويس وتحطيها فى حله بدون ميه وتسبيها على نار هاديه لحد ما تتحول صلصه وبعدين تشيلى منها القشره الى هتكون انفصلت لوحدها من الحراره وبعدين فى برطمنات ازاز وفى الفريزر  ودى تعتبر صلصه خام يعنى كام معلقه منها عل ميه لما تيجى تطبخى بيها الثوم بأه قشرى كل الكميه الى عايزه تخزنيها وبعدين اغسليه وسيبها تتصفى شويه وبعدين افرميه فى الكبه مع معلقه خل وشوية ملح صغيرين وابدأى وزعيه فى برطمنات صغيره وحطيه فى الفريزر  وكل ما تحتاجى تستخدميه خرجى برطمان صغير فى التلاجه لحد ما يخلص طلعى غيره وهكذا حاجه بأه فعلا طلعت جميله جدا الملوخيه / هاتى كام كيلو كدا وقطفيها وبعدين اغسليها كويس وسيبيها تنشف كويس اوى،خرطيها بعد لما تنشف او افرميها فى الكبه زى ما تحبى وبعدين فضيها فى حله او اى اناء تانى وضيفى عليها مغرفتين شوربه لكل كيلو ولازم الشوربه تكون بارده وقلبيها كويس طبعا هتكون تقيله جدا سيبها على كدا وابداى وزعيها فى اكياس كل كيس يكفى طبخه وطبعا اعملى حساب انك هتزوديها شوربه عند الاستخدام
اليوم الى هتطبخى فيه ملوخيه طلعيها وحطيها فى حله فيها شوربه دافيه وسيبها تفك واطبخيها عادى بأه واتمتعى باحلى ملوخيه خضرا طوووول السنه نيجى بأه للفلفل يفضل الاحمر اشترى كميه كبيره من الفلفل ويكون فيه كام واحده حمرا وحطيه فى مصفاه وسيبيه بره التلاجه لحد ما يحمر كله وبعدين افرميه فى الكبه مع ملح وضيفى عليه معلقه كبيره خل وقلبيه كويس وشيليه فى برطمنات صغيره وخلى واحد فى التلاجه والباقى فى الفريزر لحين الحاجه الشبت والكزبره الخضرا والبقدونس / نضفيهم كويس وبعدين اغسليهم وسيبيهم يتصفوا كويس اوى وبعدين قطعيهم ووزعيهم فى اكياس وفرغى الهوا وفى الفريزر شيليهم  بيبقوا حلوين جدا جدا عن تجربه الليمون /فى طريقتين اولهم اعصرى الكميه الى هتخزنيها وحطيها فى برطمنات وشيليها فى الفريزر
والطريقه التانيه اشترى الليمون الى حجمه كبير وقشريه وقطعيه اربعه وشيلى فى كل كيس الى يكفى لمرة عصير وشيليه فى الفريزر الفراوله /نضفيها وبعدين اغسيلها كويس وبعدين وزعيها فى اكياس فرغى منها الهوا وشيليها فى الفريزر البرتقال / اغسليه كويس وبعدين قشريه وبعدين قطعيه كل واحده اربعه وشيلى منه البذر وبعدين وزعيه فى اكياس وشيليه فى الفريزر المانجه /انا شخصيا بعملها بطريقه مختلفه شويه بس حلوه جد ،بجيب المانجه بكميه كبيره وبعدين بغسلها كويس بميه وخل واشيلها حب سليم فى الفريزر لمدة يوم كامل تانى يوم اخرجها واسيبها عشر دقايق بالظبط علشان مش عيزاها تفك اوى وبعدين ببدأ اقطعها خرط وهى مجمده كدا علشان تكون متماسكه وبقطعها بالقشر على فكره اولا علشان الفايده الى فيه ثانيا بيدى لون حلو اوى للعصير وبفضل اقطع كل الكميه خرط خرط واوزعها فى اكياس وافرغها من الهوا واشيلها فى الفريزر  ووقت الاستخدام بطلعها وافضى الكيس فى لتر ميه فى الخلاط واضيف عليها السكر واسيبها عشر دقايق تفك فى الميه وبعدين اضربها واصفيها بتكون زى الطازه بالظبط مفيش فرق ممكن كمان تدمسى فول بطريقتك عادى وتشيليه مستوى فى اكياس فى الفريزر وكمان الفاصوليا واللوبيا ممكن تسلقيها نص سلق وتشيليها فى اكياس ورق العنب بأه /نضفيه ومن غير ما تغسليه ولا تسلقيه شيليه فى اكياس لما تيجى تخرجيه هتلاقيه زى المسلوق بالظبط اغسليه كويس بميه سخنه واحشيه كدا بيكون طعمه افضل كتيييير من الى متشال مسلوق الكرنب /اسلقيه سلق خفيف وقطعيه ووزعيه فى اكياس وعند الاستخدام سيبيه يفك هتلاقيه مسلوق كويس ومش محتاج سلق تانى احشيه على كدا
كمان الخوخ ممكن تغليه لدقيقه فى ميه وبعدين حطيه فى ميه بتلج وبعدين شيلى البزره منه ويفضل القشر ووزعيه فى اكياس بكدا يكون خلص موضوعنا النهارده وياريت تجربوا الوصفات دى وانتو هتتعبوا يوم وترتاحوا ميه وبجد كلها جميله جدا جدا اتمنى اكون قدرت افيدكم بموضوعنا النهارده واستنوا منى موضوع جديد ووصفات مجربه مع ياسمين ……… 
 

Leave A Comment?