الثلاثاء، 30 أغسطس، 2016

مركز الاورام بطنطا

مركز الاورام بطنطا

الموقع :
شارع الدكتور نجاتى ،طنطا من شارع الجيش بجوار مستشفى الجامعة 
ت: 0403337505  
المركز مفتوح ٢٤ ساعة بالمجان

يستقبل المركز اكثر من ٥٠٠ مريض يوميا 
عيادات خارجية فى جميع تخصصات الاورام 
وجود وحدة للكشف المبكر عن اورام الكبد والبروستاتا وعنق الرحم والثدى 
يستقبل المركز جميع الحالات بالمجان 
تتم كافة التحاليل الطبية بمعامل المركز بواسطة نخبة من الاطباء والاستشاريين 
تكلفة علاج هذا المرض عائقا امام توفير الكثير من الاحتياجات فأن التبرع من اهل الخير يعد رافدا مهما فى تدبير تكاليف العلاج للمرضى الذين يتلقونه بالمجان حيث يتلقى مركز اورام طنطا المساعدات المادية فى مقره بشارع البحر بطنطا  
اوالتبرع على حساب البنك الاهلى رقم 9/450180263/9
http:www.Facebook.ctcct4arb 
ادارة المركز كل فترة تشكل لجنة لاخذ عينات من المركز للتأكد من السلامة بغرف المركز كاجراءات احترازية حيث ان بعض الاشخاص حاولوا اساءة سمعة مركز الاورام طنطا وذلك من اجل مصالحهم الشخصية وردا على عدم وجود كوادر بقسم الجراحة

قسم الجراحة 
به ٦ اطباء منهم ٥ حاصلين على الدكتوراة من المعهد القومى للاورام والسادس من جامعة عين شمس ويتمتعون بخبرات ولديهم كفاءات عالية فىى اجراء العمليات 
المركز ملئ بالكوادر الطبية ليس فى قسم الجراحة فقط ولكن فى كل الأقسام 
ويستطيع المركز ان يقدم خدمة طبية مامينة مبنية على اسس علمية ولا يوجد بالمركو سرير خالى

تجرى فى المركز جميع جراحات السرطان تتبع علاج احدث بروتوكولات العلاج الكيماوى والدولة تقوم بتغطية نفقات العلاج

الاكتشاف المبكر :-
المشكلة الرئيسية للسرطان هو ان المرض يأتى فى مرحلة متأخرة وينعكس ذلك سلبيا على العلاج  
ولتفادى مشكلة تأخر اكتشاف مرض السرطان لا بد ان يكون لدينا برنامج قوى لمكافحة السركان ومنها القاعدة التى ينطلق منها هذا البرنامج اذ يتم حصر معدلات الاصابة وانواعها فهذا البرنامج يعتبر امنا قوميا ولا بد من وضع خطط للوقاية من انواع سرطانية عديدة مرتبطة بالبيئة المصرية مع اعطاء دفعة اكبر لمنظمة الاكتشاف المبكر للسرطان 

مركز الفا لعلاج الاورام Alfa cure oncology center

كثير من مرضى الاورام لا يعرفون اماكن مراكز علاج الاورام نحن نساعدهم فى معرفة اماكن افضل مراكز الاورام

مركز الفا لعلاج الاورام
الموقع :

١٦ ش النزهة ميدان تريومف امام مدرسة ليسيه الحرية
المهندسين ش جامعة الدول بجوار بنك CIb اخر سور نادى الزمالك

جهات الاتصال:
ت:0114744739/33058526/33058527/01001300236

يعمل هذا المركز على تقديم احدث العلاجات للمرضى لتلقى افضل النتائج العلاجية ويقدم افضل خدمة طبية ممكنة ويقوم بدعم الجهود المبذولة فى مكافحة المرض ويقوم المركز بتوفير مستوى مميز من الرعاية لكى يستفيد المرضى من البيئة الداعمة التى تلتزم بتوفير الدعم المطلوب والدعم الغذائى والنفسى لهم والفحص المبكر واختبارات الكشف ودعم خدمات العلاج الاشعاعى ويقوم المركز بالتعاون مع الكثير من الخبراء الدولييين حيث يستضيف المركز خبير الاورام الفرنسى من فترة ٢١_٢٥ سبتمبر ٢٠١٦

طريقة الدفع
اما نقدى او ائتمانى

المركز الاورام التخصصى S.O.C

مركز الأورام التخصصي

الموقع : ١٢ ش الدقى ،الجيزة ،الدور التاسع اعلى مكتبة سمير وعلى الدقى

يوجد به العلاج الكيميائي والعلاج الإشعاعي  . ولديهم الطبية والصيدلانية، وإداري فريق العمل تحت إشراف الأستاذ الدكتور أحمد سليم فؤاد، الذي يتمتع 30 عاما من الخبرة في علاج الأورام في مستشفى قصر العينى، جامعة القاهرة، فضلا عن الخبرة في العديد من الدول الأوروبية والأمريكية. 
خطة العلاج
 الخطة العلاجية الأولية هي واحدة من عوامل النجاح أهم لعلاج الاورام  الأورام. وهذا يتكون من عدة خطوات : -
التشخيص - الأشعة - علم الأمراض (مختبر) - العلاج الجراحي     

مرضانا الاستفادة من خبرتنا الواسعة والمعرفة من أفضل الخدمات المتاحة لل التشخيص والعلاج والجراحة والنهج النفسي في جميع مراحل العلاج وهذا هو السبب
الأستاذ الدكتور أحمد سليم فؤاد هو المركز التخصصي للأورام يتلقى مرضى السرطان، وتحدد الفحوص الدقيقة للمساعدة في تحديد منشأ السرطان والمرحلة. المركز يعامل سرطان الثدي وأورام الجهاز الهضمي وأورام المعدة والقولون والكبد والبنكرياس الأورام، وأورام الرقبة والجهاز التنفسي وسرطان الصدر، والمسالك البولية والبروستاتا والأورام، اضطرابات التكاثرية اللمفية والأورام الأخرى.
الإشراف على العلاج الإشعاعي
 المركز ينفذ ويشرف العلاج الإشعاعي في أفضل مراكز العلاج الإشعاعي، وذلك باستخدام أحدث الأجهزة في مصر
.الإشراف على العلاج الكيميائي
 يستقبل المركز ويعامل المرضى العلاج الكيميائي باستخدام أحدث الأساليب، داخل وخارج المركز. مركزنا على الرغم من أن الفريق الطبي لدينا هو كفاءة عالية، والدكتور أحمد سليم يشرف شخصيا جميع مراحل التشخيص والعلاج ومتابعة -up بعد استكمال العلاج.

جهات الاتصال 
ت:0237626131
الفاكس: 37626931_02
Info@ahmedsaleem.com
http:www.drahmedseilim.com 


الاثنين، 29 أغسطس، 2016

ست بيت شاطره

ضمن

اهلا بكل متابعينى مره تانيه مع موضوع جديد يهم كل بيت وان شاء الله يعجبكوا

طبعا معظمنا ستات بيوت وكل ست بيت مسؤولياتها بتكون كبيره جدا من تربية اولاد لتنظيف وترتيب البيت للاكل والحلويات  وخلافه وياسلام  بأه لو كانت مرأه عامله عن  تجربه الموضوع بيكون شاق لابعد الحدود علشان كدا حبيت اتكلم معاكوا النهارده عن ازاى تكونى ست بيت شاطره مش بس علشان بيتك واولادك وزوجك لا كمان علشان راحتك اولا
معايا ليكوا النهارده شوية معلومات جديده وعن تجربه نتيجتها هايله اتمنى تجربوها وتشوفوا بنفسكوا
سجلوا معايا الحاجات دى هتنفعكوا جدا

:-) اولا كلنا عندنا ابواب بيضاء وطبعا تنظيفها بيكون متعب جدا لكن مع ياسمين الموضوع غير جربى الطريقه دى وشوفى بنفسك اد ايه سهله ونتيجتها واو
هاتى ميه وقطعى بصله او اتنين واغليها بيها وبعدين امسحى بيها الابواب بدون استخدام الصابون وشوفى النتيجه

:-) علشان تلاجتك تعيش فتره اطول افصيلها كل عشر ايام لمدة عشر دقايق او بالكتير ربع ساعه وخليها عاده علشان تلاجتك تحتفظ بقوة تبريدها مع طول الاستخدام

:-) طبعا الطاسه او اى شئ بيتعمل فيه بيض بيغلبنا شويه فى الريحه وخاصة لو بيض مسلوق علشان تتخلصى من كل اثار البيض من الاوانى والمعالق واى شئ تانى ادعكيها بشوية ملح خشن بدون صابون وبعدين اشطفيها بميه سخنه وسيبها تجف مش هتلاقى اى اثر لريحه البيض ابدا او حتى للون الازرق لو بيض مسلوق

:-) طبعا بأه كل فتره السكاكين بتبرد ودا بيعطلنا كتير وبيخلينا نمل لو هتسنى السكاكين بمسن البيت يبقى حطي السكاكين فى ميه مغليه لمدة خمس دقايق وبعدين نشفيها وسنيها بتفرق كتييير

:-) لو عندك حلل من الالمنيوم وبتغلبك فى تنظيفها ودعكها يبقى انسى التعب وادعكيها الاول بقشر ليمون وبعدين المسحوق العادى بتنضف جدا وكمان بتبيض بسرعه

:-) حاجه بأه انا شخصيا استاذه فيها وهى حرق الاوانى  علشان تتخلصى من آثار الجريمه ادعكى الاوانى دى بملح خشن مع عصير ليمون وبعدين اشطفيها وجففيها كويس وشوفى النتيجه الحكايه دى مسعدانى كتيييير الحقيقه

:-) :-) بعد الطبخ او القلى بالاخص بالزيت او السمنه نضفى البوتوجاز بمسحوق غسيل الهدوم الى بتستخدميه وادعكيه بورق جرايد لانه له خاصية التلميع

:-) مشكله بأه سيراميك المطبخ عندى مثلا سقف المطبخ كمان سيراميك ودى مشكله الحقيقه جربى الطريقه دى علشان تنضفى بيها سيراميك المطبخ
ميه فاتره هتدوبى فيها خل ابيض كميه بسيطه يعنى وعصير ليمونه او اتنين وشويه كحول نقى  ولمعى بيه السيراميك وشوفى هيبرق ازاى واد ايه هينضف اكتر من الطرق المعتاده ومتنسيش تدعيلى

:-) لو عندك اوانى فضيه او نحاسيه زى صوانى التقديم مثلا ومش عايزاها تبوظ من الدعك المستمر قبل الدعك حطى عليها طبقه خفيفه من الفازلين وبعدين نضفيها وبكدا هتحافظى عليها من تآكل الطبقه الخارجيه

:-) لو عايزه ادوات  السفره ترجع تلمع زى اول مره اشترتيها حطيها تغلى فى ميه مخلوطه بشويه مسحوق اطباق مع عصير ليمونه وسيبها تغلى لمده ربع ساعه على نار هاديه وممكن كمان السكاكين تلمعيها بنفس الطريقه بعد لما تخلص الربع ساعه اشطفيها كويس هتلاقيها بتلمع جدا كأنها جديده بالظبط

:-)  طيب عملتى النهارده سمك والريحه قلبت الدنيا ايه الحل ؟
وانتى بتقلى السمك هاتى صفيحه صغيره مش محتجاها وحطى فوقيها شوية فصوص مستكه على نار هاديه هتمتص الريحه تماما علشان متقلبيش ريحة البيت كله

:-) كلنا طبعا بنخرط بصل للاسف ودا بيعمل ريحه فى ايدينا بتضايق جد لو عايزه تتخلصى من ريحة البصل فى ايديكى تماما ادعكى ايديكى بشوية بن مطحون وبعدين اغسليها بميه وليمون وبس كدا اختفت ريحة البصل

:-) لو عايزه ريحة مطبخك تفضل حلوه لفترات طويله ضيفى على مياه المسح شويه ماء كولونيا  ودى افضل كتيير من المطهرات العاديه وبتفضل فترات اطول كمان

:-) كمان مهم جدا تنضفى تلاجتك مره كل عشر ايام نضفيها بميه وصابون كويس وبعدين اشطفيها بميه فيها كولونيا للتطهير وكمان علشان ريحتها تفضل حلوه ومتنسيش طبعا تجففيها كويس قبل التشغيل

:-) لو عايزه تتخلصى من اى روايح مزعجه فى تلاجتك وتكون ريحتها ديما حلوه هاتى قشر برتقال وليمون وقطعيه قطع متوسطه وحطيها فى اماكن متفرقه فى تلاجتك فى كذا طبق صغير مثلا وبكدا القشور دى هتمتص اى روايح وهتدى تلاجتك ريحه البرتقال والليون ديما وطبعا غيرى القشور دى كل مده

:-) ممكن كمان لو مش عايزه الروايح تختلط ببعضها تحطى حتة فحم فى التلاجه دى بأه بتمتص الروايح العالقه جدا جدا عن تجربه

:-) خلى بالك اوعى تشغلى التلاجه بعد تنظيفها مباشرة لازم تستنى على الاقل ساعتين علشان ترصى فيها اكلك وبعدين تشغليها غير كدا تبقى قاصده تبوظيها

:-) علشان تحافظى على حدة الفتاحات الخاصه بالمعلبات والحاجه الساقعه وخلافه لازم تنقعيها مره كل شهر فى ميه مخلوطه بخل وليمون وبعدين اشطفيها وجففيها فورا وشيليها مكانها تانى

:-) لو عندك بقع زيت على مطبخك حطى عليها دقيق قمح لمدة ساعه وبعدين اشطفيها بميه سخنه ونشفى المطبخ بعدها

:-) لو عندك بقع قهوه فى اى مكان بمطبخك اتخلصى منها عن طريق اضافة نشادر لمية المسح وشوفى النتيجه بنفسك

:-) لما تفتحى علبة صلصه خدى الكميه الى انتى عايزاها وقبل ما تحطيها فى التلاجه حطى على وشها زيت علشا متعفنش بسرعه وهى فى التلاجه لان الصلصه بالذات عمرها قصير

:-) لو هتعملى مربى فى البيت هاتى البرطمان الى هتحطى فيه المربى وعرضيه لبخار ماء مغلى من قلبه وبعدين نشفيه كويس علشان تمنعى البكتيريا تتسرب للمربى

:-) حاجه اخيره مهمه جدا جدا جدا لكل ست
لوعندك نمل فى مطبخك وزهأآنه منه هاتى شويه صودا وضيفى عليها السكر ورشيها فى المكان الى بيخرج منه النمل او المكان الى بيتجمع فيه وهتلاقيه مات فورا وممكن كمان ترشى جبس او رماد وهتلاقى نفس النتيجه بردو

:-) طيب لو عندك نمل او اى حشرات تانيه فى خزانات المطبخ تتخلصى منها ازاى ؟
اقولك انا ياستى /رشى فى الخزانات الى شفتى فيها الحشرات قهوه مره او فلفل اسود مش مطحون ومش هتلاقى اثر لحاجه بعد كدا

وقبل ما انهى موضوعنا النهارده عايزه اقولكوا على حاجه تريحكوا من سؤال كل يوم هعمل اكل ايه النهارده ؟
اعملى جدول اسبوعى كل اول اسبوع وحددى فيه الاكل الى هتعمليه على مدار الاسبوع وبصى فى الجدول كل يوم وبس كدا
اتمنى اكون قدرت افيدكم يارب واستنونى فى موضوع جديد يهم كل بيت مع ياسمين وبس ...........

الأحد، 28 أغسطس، 2016

لأظافر صحيه اكتر

ضمن

مساء الورد  يارب تكونوا بخير جميعا ويارب موضوع النهارده يعجبكوا
النهاره هنتكلم عن الاظافر وطبعا مفيش ست تحب اظافر ايديها ورجليها يكون شكلها مش حلو النهاره جايبلكوا معلومات مهمه هتفيدكوا جدا ان شاء الله فى العنايه بأظافركوا
سجلوا معايا مجموعة النصايح دى علشان متنسوش
اول حاجه لازم تعرفى ان ضوافرك بتتكون من طبقات مقواه من البروتينات علشان كدا كمية البروتين الى هيحصل جسمك عليها هتأثر جدا فى شكل وصحة ضوافرك فخلى بالك لازم تاخدى كفايتك من البروتينات سواء لحوم بيضاء او حمراء او منتجات الالبان او منتجات الصويا

تانى حاجه لازم تهتمى بالاطعمه الى فيها الحديد زى الكبده الباذنجان وكمان السبانخ وخلافه من الاطعمه الغنيه بالحديد وكمان الاوميجا ٣  اولا علشان الحديدبيساعد على اعطاء ضوافرك وجلدك وشعرك مظهر صحى  ثانيا الاوميجا ٣ دى بأه بتحتوى على احماض دهنيه والى بتمنع او بتقى ضوافرك من التقصف او التشققات ودى بتلاقيها فى المكسرات بوجه عام

ثالثا /استخدمى مبرد الاظافر بشكل صحيح طيب ازاى نستخدم مبرد الاظافر بطريقه صحيحه ؟

اول حاجه لازم تهذبى ضوافرك اول باول
تانى حاجه بلاش تستخدمى المبرد فى اتجاهين رايح جاى يعنى الافضل والاصح تبرديها فى اتجاه واحد
تالت حاجه ودى مهمه جدا جدا انك لازم تبردى ضوافر ايديكى او رجليكى وهى ناشفه تماما لان الضوافر لما بتكون مبلله بتكون ضعيفه نوعا ما ودا بيعرضها للكسر او التقصف فخلى بالك من النقطه دى كويس

رابعا بأه ضوافرك زى اى حاجه فى جسمك محتاجه عنايه مستمره فإيه المشكله انك تعملى وقت خاص للعنايه بضوافرك ولو حتى مره واحده كل اسبوع ودا على الاقل طبعا ويفضل يكون مرتين تلاته اسبوعيا
الوقت دا هتعملى فيه باديكير سريع فى بيتك من غير ما تحتاجى لمركز تجميل ولا حاجه ،طيب ازاى تعملى باديكير فى البيت ؟
اقولك انا /هاتى قطنه اغمسيها فى زيت فيتامين  E  ومشيها على الاظافر وعلى الجلد الزائد حول الاظافر وبعدين هاتى كريم مرطب وحطيه على الجلد دا وابدى شيليه بالراحه هتلاقيه بيتشال معاكى بسهوله جدا وبعد العمليه دى حطى مقوى اظافر على اظافرك لان المقوى بيساعدك على الحصول على اظافر قويه وخلى بالك بلاش مقوى الاظافر الرخيص الى كل مهمته انه يعمل طبقه على الظفر وخلاص لا هاتى نوع كويس علشان الضفر يتشربه

خامس حاجه وياريت ناخد بالنا كويس من النقطه دى بالذات بلاش ياجماعه مزيل طلاء الاظافر الى بيحتوى على الاسيتون  لو انتى بتحطى طلاء اظافر يبقى اختارى مزيل طلاء لا يحتوى على الاسيتون بالمره لان الاسيتون ماده بتؤدى لجفاف الاظافر ومع الوقت لهشاشتها كمان  اسألى الصيدلى على مزيل بيحتوى على مادة الاسيتات بدل الاسيتون ودا هيكون افضل والطف على ضوافرك بكتييير عن الاسيتون

طيب حاجه كمان ديما بأكد عليها كتير فى كل المواضيع الخاصه بالبشره والشعر والاظافر وهى كمية الميه الى بنشربها وازاى بتأثر على جسمنا لازم جسمنا يفضل مترطب طول اليوم ودا بشرب كميات كافيه من المياه والعصاير كمان وبجد الموضوع دا  بيفرق كتيير فى شكل وصحة الشعر والجلد والاظافر فياريت نشرب ميه وعصير بكميات كافيه على مدار اليوم
بالاضافه للميه والعصاير كمان ياريت نتعود على شرب كوباية حليب كل يوم ودا هيساعد ضوافرك تكون اقوى كتيير

كمان ياريت نعرف يابنات ان ضوافرنا جزء من جسمنا مش اداه بلاش تستخدمى ضوافرك كأداه لجذب او لفتح اى شئ لان الحركه دى بتضعف الضوافر جدا جدا وكمان مع تكرار الحركه دى الضوافر بتكون ارق من الاول وبتكون سهلة الكسر والتقصف 
حفاظك على ضوافرك بعيده عن الحاجات المرهقه دى بيخليها تفضل قويه وكمان علشان تنمو بشكل طبيعى وصحى

لو نفذتى النصايح دى هتحصلى على اظافر صحيه ومظهرها جميل جدا
بس كمان بالاضافه للنصايح دى جايبلكوا النهارده وصفه طبيعيه ميه فى الميه ليها مفعول السحر بجد فى تحسين حالة الضوافر المتقصفه والضعيفه والباهته كمان سجلوا معايا الوصفه دى وشوفوا النتيجه بنفسكوا

ايه هى مكونات الوصفه دى ؟مكونات الوصفه دى هى التوم فقط بس كدا ؟ ايوه بس كدا ؟
نيجى بأه للخطوات
مبديئا هما كذا طريقه  الطريقه الاولى هى /هاتى كام فص من التوم وبعدين قشريها وبدون غسيل علشان تفضل محتفظه بكل فايدتها اقسمي الفص الواحد نصين وابدأى ادعكى بيه ضوافرك لمدة دقيقتين او تلاته بالكتير لحد بس ما ضوافرك تمتص عصير التوم
الطريقه التانيه /قشرى التوم وافرميه ناعم جدا وبعدين حطيه على طلاء الاظافر الى بتستخدميه ديما وسيبيه من خمس لعشر ايام وبعدين استخدمى الطلاء عادى جدا ومش هتصدقى شكل ضوافرك ازاى هيكون صحى بجد تحفه جدا عن تجربه

كمان فى طريقه اخيره وهى انك تشترى معجون التوم جاهز من اى سوبر ماركت وحطيه زى ماسك على ضوافرك لحد ما يمتص الميه الى فى العجينه

اى طريقه من دول هتخليكى تستفيدى من التوم وشوفى بنفسك النتيجه طبعا هتعملى الماسك دا او اى طريقه من دول مره اسبوعيا هتلاحظى التحسن الى هيحصل من اول مره ومره بعد مره هتختفى مشاكل ضوافرك نهائيا

نصيحه اخيره ياريت لو كنتى حامل او فى فترة رضاعه تاخدى حبوب كالسيوم مناسبه ليكى باستشارة طبيبك دا هيساعدك جدا على تعويض الكالسيوم الى بيفقده جسمك فى الفتره دى والى بيأثر جدا على الشعر والجلد والاظافر طبعا كمان اهتمى بتناول الحليب والزبادى والجبن والاطعمه الغنيه بالكالسيوم عامة

اتمنى يارب موضوع النهارده ينول اعجابكوا واستنونى فى موضوع جديد مع ياسمين .........

السبت، 27 أغسطس، 2016

لبشره صحيه

ضمن

مساء الخير اهلا بيكم مره تانيه معايا وموضوع جديد يهم كل بيت اتمنى ينال اعجابكم ان شاء الله .

بناء على طلباتكم هنتكلم النهاره عن مشاكل البشره واسبابها والحلول كمان من رأى افضل اطباء جلديه تابعوا معايا  وان شاء الله هتلاقوا حل لكل مشاكل بشرتكوا .

خلينا نبدأ مع بعض بأول مشكله/وهى جفاف البشره :-) دا بيحصل عامة بسبب الاكزيما او التهابات الجلد الى بينتج من الحساسيه الى بتسببها بعض انواع الاطعمه او من بعض المركبات الكميائيه سواء كانت ادويه او ادوات مكياچ او كريمات غير مناسبه  كمان الظروف الجويه القاسيه سواء البرد الشديد او الحراره الشديده
كمان العطور القويه بتأثر بشكل سلبى جدا على البشره

طيب نيجى بأه للحلول ايه الحل لجفاف البشره ؟
يفضل طبعا استخدام حلول طبيعيه ومن افضل الحلول الطبيعيه للتخلص من جفاف البشره الزيوت دى
اولا زيت بذور العنب
ثانيا زيت المشمش
ثالثا زيت الرمان
طيب دا لوشك لو عايزه ترطبى ايديكى اعملى التجربه دى وادعيلى هاتى فوطه وبليها بميه وزيت زيتون ولفيها على كف ايديكى لمدة من عشر دقايق لربع ساعه  وشوفى النتيجه بنفسك

طيب نيجى بأه لتانى مشكله ودى منتشره جدا وهى البقع الداكنه سواء للوش او لليدين ودى ليها اكتر من سبب اقواهم سببين
الاول هو التقدم فى السن والبقع الداكنه بتكون من علاماته الاولى
السبب التانى هو التعرض بشكل مستمر دون عامل وقايه او بمعنى اوضح من غير كريم واقى من اشعة الشمس ودا بيزود البقع دى جدا فياريت نستخدم سن بلوك يكون مناسب وياريت طبعا الى يوصفهولك يكون طبيب جلديه متخصص
طيب ايه هى حلول المشكله دى
الحل هنا هو استخدام كريم تفتيح يحتوى على  الهيدروكينون مع فيتامين سى اولو المشكله كبيره ممكن تعملى تقشير كميائى  او العلاج بالنبضات الضوئيه

كمان عندنا مشكله اتكلمنا فيها قبل كدا وهى الهالات والانتفاخات حول العين وزى ما قلتلكوا قبل كدا السبب بيكون السهر وشرب المنبهات الكتير وخلافه ومع تكرار الاسباب بيصحب الهالات انتفاخات حول العين وطبعا الشكل بيكون مزعج جدا
طيب ايه بأه الحل ؟ اولا بالنسبه للانتفاخات /قللى من اكل الملح والاطعمه المملحه زى المخللات والموالح وخلافه ودا بيساعد جدا على تقليل الانتفاخات
كمان زى ما قلنا قبل كدا استخدمى جل مخصص للعين باستشارة طبيب عن ايه النوع المناسب
متنسيش كمان المساج بحركه دائريه على العين نفسها
وكمان زى قلنا قبل كدا استخدام قطعه من الثلج لفيها فى قماشه واعملى بيها مساچ لتحت العين وفوقيها كمان

وطبعا شرايح الخيار المجمده ممكن تستخدميها كبديل للتلج ودى نتيجتها هايله

نيجى بأه لمشكله كمان جانى كذا طلب علشان اتكلم عنها وهى المسام الواسعه /
لو لاحظتى ان مسام بشرتك اصبحت اوسع من الاول بمرور الوقت فاعرفى ان المرحله الجايه تجاعيد لان معنى اتساع مسام بشرتك ان جلدك فقد نسبه كبيره من الكولاجين ودا طبعا بيؤدى للتجاعيد مع مرور بعض الوقت
طيب ايه هى الحلول المتاحه هنا ؟
الحل هنا هو انك تحاولى قدر الامكان تحافظى على بشرتك مشدوده طيب دا يحصل ازاى ؟دا يحصل عن طريق استخدام امصال وكريمات تحتوى على مادة الببتيد
كمان لازم هنا تستخدمى غسول لبشرتك يكون بيحتوى على حمض السالسيلك علشان يساعد جلدك يتخلص من الزيوت الزياده وكمان الخلايا الميته الموجوده فى بشرتك علشان تقدر بشرتك تجدد الخلايا وتصلحها

نيجى بأه لمشكله كبيره جدا وهى حب الشباب ودا عامة بيصيب حوالى اربعين فى الميه من الشباب بتبدأ الحبوب دى فى الظهور من سن البلوغ وبتزول بتقدم العمر عند منتصف العشرينات مثلا بس مش عند كل الناس فى ناس بتستمر معاهم المشكله لحد منتصف الثلاثينات ، لو كنتى بتعانى من حب الشباب اعملى الماسك دا وان شاء الله هتلاقى نتيجه كويسه
هاتى حب الرمان واعصريه واخلطيه مع معلقه كبيره خل وامسحى بيه مكان الحبوب  .
وخلوا بالكوا فى حاجات بتزود الحبوب دى زى ايه ؟
مثلا لو مغسلتيش وشك كويس بالميه الفاتره والصابون المناسب تلت مرات الحبوب بتزيد
كمان افراغ الحبوب بايديكى او بأى اداه بيزود الحبوب
وكمان لو شعرك نازل على جبينك بردو الحبوب بتزيد

طيب لو فى حبوب خفيفه فى وشى اعمل ايه ؟
هنا الموضوع بسيط هاتى قطعة تلج لفيها فى قطن وحطيها على الحبوب وحاولى تتجنبى لمس الحبوب بايديكى او بالاظافر لاطول فتره ممكنه

حاجه اخيره مفيده جدا ياريت نعملها باستمرار وهى تدليك الوش ودا بيكون عن طريق قرص البشره بنعومه بين السبابه والابهام وطبعا بتعملى الحركه دى على كل اجزاء وشك  وخلى بالك مجرد دقيقتين كفايه للتدليك اليومى
بكدا نكون خلصنا موضوع النهارده اتمنى يعجبكوا واكون قدرت افيدكم يارب واستنونى فى مواضيع جديده وكتيره مش هتلاقوها غير مع ياسمين ..........